កាលពីថ្ងៃទី២៩ ខែកញ្ញា ឆ្នាំ២០២១ មូលនិធិក្រុមប្រឹក្សាអាជ្ញាកណ្តាលបានរៀបចំវគ្គបណ្តុះបណ្តាលដោយផ្តោតលើប្រធានបទ “ការប្រាស្រ័យទាក់ទងសម្រាប់ការចរចានៅកន្លែងធ្វើការ” ដែលជាប្រធានបទចុងក្រោយនៃកម្មវិធី ការបង្ការ និងដោះស្រាយវិវាទនៅកន្លែងការងារ។ វគ្គបណ្តុះបណ្តាលនេះ មានអ្នកចូលរួមចំនួន ១៦នាក់ ក្នុងនោះស្រី ១៤នាក់ (២នាក់ចូលរួមតាមអនឡាញ) ជាតំណាងនិយោជក និងកម្មករនិយោជិត រួមមាន អ្នកគ្រប់គ្រងផ្នែកធនធានមនុស្ស មន្ត្រីផ្នែកទំនាក់ទំនងវិជ្ជាជីវៈ មន្ត្រីផ្នែកបណ្តុះបណ្តាល មន្ត្រីផ្នែកដោះស្រាយវិវាទ ប្រតិភូបុគ្គលិក អ្នកគ្រប់គ្រងកម្មករតាមផ្នែក ព្រមទាំងសមាជិកនិងថ្នាក់ដឹកនាំសហជីព។
វគ្គបណ្តុះបណ្តាលនេះ មានគោលបំណងលើកកម្ពស់ការយល់ដឹងដល់សិក្ខាកាមអំពី ការចរចានិងទម្រង់នៃការចរចា ការចរចាដោយផ្អែកលើជំហរ និងការចរចាដោយផ្អែកលើផលប្រយោជន៍ ជំនាញនិងលក្ខណៈសម្បត្តិនៃការចរចាដ៏ល្អ និងការត្រៀមរៀបចំសម្រាប់ការចរចាដ៏មានប្រសិទ្ធិភាព។
វគ្គបណ្តុះបណ្តាលរយៈពេលពេញ១ថ្ងៃនេះ បានពិភាក្សាលើប្រធានបទសំខាន់ៗដូចជា អ្វីជាការចរចា, ទម្រង់និងប្រភេទនៃការចរចា, ជំនាញសម្រាប់អ្នកចរចាដ៏ពូកែ, លក្ខណៈសម្បត្តិនៃអ្នកចរចា, និងការត្រៀមខ្លួនសម្រាប់ការចរចា។ ជាមួយគ្នានេះដែរ វគ្គបណ្តុះបណ្តាល បានប្រើវិធីសាស្ត្របែបចូលរួម ដូចជា ល្បែងឆ្លុះបញ្ចាំង ការពិភាក្សាក្រុម ការសំដែង ការទស្សនាវីដេអូលើប្រធានបទឈានដល់កិច្ចព្រមព្រៀង និងការអនុវត្តករណីសិក្សាដែលបានបង្កើតបរិយាកាសអំណោយផលដល់ការចូលរួមរបស់សិក្ខាកាម។ វគ្គបណ្តុះបណ្តាលនេះ មានការចូលរួមសម្របសម្រួលដោយក្រុមការងារផ្នែកសេវាច្បាប់ និងផ្នែកបណ្តុះបណ្តាល និងទំនាក់ទំនង របស់មូលនិធិក្រុមប្រឹក្សាអាជ្ញាកណ្តាល។
ជាកិច្ចចាប់ផ្តើម លោក យិនសៀង សុមេធ ប្រធានផ្នែកបណ្តុះបណ្តាល និងទំនាក់ទំនង បានសម្របសម្រួលឱ្យមានការឆ្លុះបញ្ចាំងពីខ្លឹមសារមេរៀនសំខាន់ៗនៃ យន្តការនៃកិច្ចសហការនៅកន្លែងធ្វើការ ដែលមាននៅក្នុងម៉ូឌុលទី២។ បន្ទាប់មក លោក សុមេធ បានចាប់ផ្តើមមេរៀននៅក្នុងម៉ូឌុលទី៣ តាមរយៈការធ្វើបទបង្ហាញ និងសម្របសម្រួលឱ្យមានការឆ្លុះបញ្ចាំង និងការពិភាក្សាក្រុមអំពីអត្ថប្រយោជន៍នៃការចរចា។
បន្ទាប់មក លោក ស ម៉ូរី មន្ត្រីជាន់ខ្ពស់ផ្នែកបណ្តុះបណ្តាល និងទំនាក់ទំនង បានធ្វើបទបង្ហាញលើប្រធានបទ ប្រភេទនៃការចរចា ដោយផ្តោតសំខាន់លើ ការចរចាដោយផ្អែកលើគោលជំហរ និងការចរចាដោយផ្អែកលើផលប្រយោជន៍។ នៅក្នុងប្រធានបទនេះ លោក ម៉ូរី បានសម្របសម្រួលឱ្យមានការលេងល្បែងឆ្លុះបញ្ចាំង និងការសំដែងដែលទាក់ទងនឹងប្រធានបទដើម្បីឱ្យអ្នកចូលរួមងាយយល់ពីខ្លឹមសារនៃមេរៀន។
ប្រធានបទចុងក្រោយនៃវគ្គបណ្តុះបណ្តាល ស្តីពី ជំនាញ និងលក្ខណៈសម្បត្តិរបស់អ្នកចរចា និងការត្រៀមខ្លួនសម្រាប់ការចរចា ត្រូវបានសម្របសម្រួលដោយ លោកស្រី ប៉ាត ណាវី នាយិកាស្តីទីផ្នែកសេវាច្បាប់។ ក្រៅពីការរៀនសូត្រ និងការពិភាក្សាផ្នែកទ្រឹស្តី អ្នកសម្របសម្រួលបានឱ្យអ្នកចូលរួមធ្វើករណីសិក្សានិងអនុវត្តមេរៀនតាមរយៈការសំដែងការចរចា។
សូមបញ្ជាក់ថា តំណាងនិយោជក និងកម្មករនិយោជិតមកពីក្រុមហ៊ុនស្ព័រតិច បានបញ្ចប់វគ្គបណ្តុះបណ្តល ទាំងបីម៉ូឌុលនៃកម្មវិធីការបង្ការ និងដោះស្រាយវិវាទនៅកន្លែងការងារ ដែលរួមមានប្រធានបទ ១). ការកសាងទំនាក់ទំនងការងារ ២). យន្តការសហការនៅកន្លែងធ្វើការ និង ៣). ការប្រាស្រ័យទាក់ទងសម្រាប់ការចរចានៅកន្លែងធ្វើការ។
នៅចុងបញ្ចប់នៃវគ្គបណ្តុះបណ្តាល លោក យិនសៀង សុមេធ ប្រធានផ្នែកបណ្តុះបណ្តាល និងទំនាក់ទំនង បានពិភាក្សាជាមួយអ្នកចូលរួមអំពីដំណើរការនៃបង្កើតគណៈកម្មការបង្ការ និងដោះស្រាយវិវាទនៅកន្លែងការងារ ដែលមានសមាសភាពពីតំណាងនិយោជិក ប្រភិភូបុគ្គលិក និងថ្នាក់ដឹកនាំសហជីពមូលដ្ឋាន ប្រចាំរោងចក្រស្ព័រតិច។ បន្ទាប់មកទៀត មូលនិធិក្រុមប្រឹក្សាអាជ្ញាកណ្តាល នឹងចាប់ផ្តើមអនុវត្តជំហាន “ការណែនាំអនុវត្ត” នៅចន្លោះខែតុលារហូតដល់ដំណាច់ឆ្នាំ២០២១ នេះ។